比寧咸當選西甲最佳球員　為歐聯決賽造勢

皇馬中場祖迪比寧咸協助「銀河艦隊」奪得西甲冠軍之後，自己現時亦當選為今季西甲最佳球員，為出戰6月2日凌晨歐聯決賽倒戈鬥多蒙特造勢。

祖迪比寧咸上年夏天以超過1億歐元(約8.5億港元)轉會費由多蒙特加盟皇馬之後，表現更上一層樓，踢28場聯賽入19球及6次助攻，獲得今季西甲最佳球員絕對實至名歸，佢攞獎之後話：「感謝大家頒發呢個獎畀我，由於要備戰歐聯決賽，好遺憾唔可以親自出席頒獎禮，我要再次多謝球會、隊友及投票畀我嘅人。」

現年20歲嘅祖迪比寧咸效力多蒙特期間，曾當選上季德甲最佳球員，轉投皇馬之後，隨即贏埋西甲最佳球員，難怪被視為最有能力同「未來隊友」基利安麥巴比爭奪金球獎及世界足球先生嘅球員。

另外，西班牙傳媒指皇馬38歲中場莫迪歷已經同意減薪續約1年，預料短期內會正式簽新合約。