【官宣】熱刺續借迪姆華拿1季　買斷費極平

熱刺正式宣布向RB萊比錫續借前鋒迪姆華拿多1季，並有權以850萬鎊(約8,500萬港元)買斷呢位28歲德國國腳，迪姆華拿今年1月加盟熱刺以來，各項賽事上陣14場入2球及3次助攻，季尾因傷提早收咧，但會方仍然向佢投下信心一票。

據悉熱刺之所以續借迪姆華拿多1季，好大程度上因為左翼文諾索羅門長期養傷，前鋒李察利臣水準不穩及多傷患，導致孫興民需要經常擔任正前鋒，左翼位置人腳不足。迪姆華拿可以勝任前鋒同左翼，雖然佢入球把握力欠佳，但勝在速度快，盤扭技術出色，往往可以為隊友創造入球機會，所以領隊普斯迪高路決定留用佢。

迪姆華拿喺4月底英超對阿仙奴之後，因為腿筋受傷提早收咧，缺陣今季最後5場聯賽，並且無法為德國出戰今屆歐國盃。不過，從好一方面睇，迪姆華拿可以專心養傷及休息，為下季復出做好準備。