C朗將續約至2026年　渴望踢下屆世界盃

葡萄牙巨星C朗即使已經39歲，但仍然冇打算退役，根據《talkSPORT》爆料，沙特阿拉伯豪門艾納斯計劃同呢位射手續約至2026年夏天，協助佢保持比賽狀態，為葡萄牙出戰下屆世界盃。

C朗上場沙特聯賽煞科戰梅開二度，今季聯賽上陣31場入35球，國際足協會長恩法天奴都發文祝賀C朗打破紀錄，成為沙特聯賽史上單季最多入波球員。《talkSPORT》指C朗認為自己狀態仍處於高峰，並冇退意，佢唔止入選葡萄牙參加下月歐國盃決賽周大軍名單，甚至渴望出戰2026年世界盃，如果成真，佢屆時將以41歲高齡參賽。

與此同時，艾納斯亦準備同C朗續約多1年，雖然佢年薪高達2億歐元(約17億港元)，但會方及沙特當局認為佢完全值呢個價，因為以C朗嘅名氣同表現可以帶動整個沙特聯賽發展，沙特聯賽管理層希望促成C朗同艾納斯續約。

C朗現時合約將於2025年夏天屆滿，若然達成續約協議，意味C朗起碼會效力艾納斯至2026年夏天，正好同下屆世界盃無縫銜接。