水晶宮開出肥約利誘　鎌田大地或轉戰英超

日本球員喺歐洲球壇非常吃香，英超球隊水晶宮亦計劃簽入「東洋兵」，根據意大利傳媒爆料，水晶宮向拉素中場鎌田大地開出一份500萬鎊(約5,000萬港元)年薪嘅5年合約，比佢現人工多近1倍，利誘呢位27歲日本國腳加盟。

鎌田大地上年夏天約滿離開法蘭克福，以自由身加盟拉素，雖然雙方簽約4年，但第2年開始屬於「生約」，佢有權今夏提早解約離隊。據悉鎌田大地現時年薪為300萬歐元(約2,550萬港元)，當水晶宮開出500萬鎊年薪合約之後，佢隨即向拉素要求加薪，由於呢支意甲球隊財政上，難以同水晶宮競爭，恐怕未必留得住鎌田大地。

鎌田大地效力法蘭克福5季，上陣179場入40球，並協助球隊奪得2022年歐霸盃冠軍，但轉投拉素後，表現欠佳，今季各項賽事上陣38場僅入2球及2次助攻，拉素的確冇理由加薪同佢續約，鎌田大地轉戰英超機會大增。