曼聯平賣雲比沙卡　國米接收

曼聯來季大改革，講明除咗阿歷真度加拿祖同馬恩奧外，其他球員全部可以出售，近日已有球員陸逐宣布離隊，就連右閘雲比沙卡都唔例外，據報曼聯正同國際米蘭談判出售雲比沙卡，底價1,000萬鎊(約1億港元)有交易，國米準備接收。

繼安東尼馬迪爾、卡斯米路、華拉尼之後，雲比沙卡都有可能離開奧脫福，意大利傳媒《TuttoMercatoWeb》報道，曼聯準備出售該26歲右閘，正同國米談判，剛由新班主接手嘅國米已答應收購，轉會費1,000萬鎊，並將會同雲比沙卡簽約3+1，年薪270萬歐元(約2,290萬港元)。

今次交易曼聯明顯要蝕大本，事關2019年由水晶宮簽入雲比沙卡時，轉會費總值5,000萬鎊，5個球季共上陣190場入2球，球員現時只有26歲，仍然當打，但就僅以買入價嘅20%出售，今次買賣可謂損失慘重。