召喚舊將　艾格斯拉拿將重返修咸頓

修咸頓來季重返英超，增兵事在必行，據報佢哋準備召喚舊將，目標包括韋斯咸前鋒丹尼艾格斯，同埋白禮頓中場拉爾拉拿，兩人都係修咸頓舊部，母會召喚好大機會回歸。

《talkSPORT》報道，修咸頓首要增兵對象係丹尼艾格斯，呢位31歲前鋒於2018至2021年效力「聖人」3季，上陣100場入46球，佢近兩季效力韋斯咸，上陣52場僅入4球，極可能離隊，修咸頓此時提出接收，正係好時機。

修咸頓另一收購對象，係前隊長拉爾拉拿。拉爾拉拿年屆36歲，季尾亦打算離開白禮頓，佢同修咸頓有極深淵源，由青訓營至1隊前後效力14年，係佢真正母會，依家母會召喚，拉爾拉拿歸隊機會甚高。

丹尼艾格斯同拉爾拉拿雖然未試過同時效力修咸頓，但喺利物浦做過3年隊友，大賽經驗豐富，如果一齊重返修咸頓，會係好大助力。