費倫天拿2年3亞　意甲下季8隊踢歐洲賽

意甲球會今季喺歐洲大放異彩，不過費倫天拿就成為悲情主角，佢哋連續兩年喺歐協聯決賽輸波後，近2季3戰決賽都飲恨而回，亦係球會歷來6次踢歐洲賽決賽嘅第5次敗陣，「二奶命」令人唏噓。

費倫天拿上季喺意盃同歐協聯決賽都輸波，今次歐協聯又一次嘗到失敗滋味，教練伊泰利安奴賽後表示：「再一次失望，失望係因為我哋有好多入波機會，但球員已盡全力。我哋全咗3個決賽，但隊波仍未夠成熟、未夠醒目去贏一場過嘅決賽。」今次係費倫天拿歷來第6次殺入歐洲賽決賽，除1961年贏歐洲盃賽冠軍盃之外，其餘5場歐戰決賽都落敗。

隨住費倫天拿輸波，意甲下季歐洲賽陣容亦落實，國際米蘭、AC米蘭、祖雲達斯、阿特蘭大同博洛尼亞5隊出戰歐聯，羅馬同拉素參加歐霸盃，費倫天拿就再一次挑戰歐協聯，一共有8支球隊出戰歐洲賽。