美職新軍出手　3倍人工斟沙治奧拉莫斯

38歲西班牙老將沙治奧拉莫斯，上年童話式回歸母會西維爾，但經過失望嘅1季後，可能再次分道揚鑣。據報美職新軍聖迭戈出動3倍人工斟介，希望沙治奧拉莫斯成為球隊嘅王牌收購。

西班牙媒體《El Sevillista》報道，西維爾希望沙治奧拉莫斯下季繼續留效，但只開出400萬歐元年薪合約，但2025年進軍美職嘅聖迭戈，就開出1,200萬歐元年薪利誘，消息指沙治奧拉莫斯正慎重考慮轉戰美職。

沙治奧拉莫斯喺西維爾出身，之後效力皇家馬德里同巴黎聖日耳門，上年相隔18年後再度效力西維爾。近年唔少西班牙球員都去美職搵食，沙治奧拉莫斯前國家隊隊友布斯基斯同佐迪艾巴都效力國際邁亞密。