李斯特城睇中　雲佬回歸英超？

24/25球季重返英超嘅李斯特城，領隊馬利斯卡即將過檔車路士，球會亦急急物色代替人選。據比利時媒體報道，前曼聯前鋒雲尼斯達萊已成李斯特城頭號目標，佢上年離開燕豪芬後一直未有落班，有望重返英超搵食。

比利時著名記者Sacha Tavolieri報道，李斯特城屬意新領隊要係年輕同進攻型，47歲嘅雲尼斯達萊就最合心水，佢曾帶領燕豪芬贏荷蘭盃冠軍，亦做過荷蘭國家隊助教，依家處於自由身狀態，斟介難度相對冇咁大。

如果雲尼斯達萊答應執教李斯特城，佢同老將前鋒占美華迪將會係有「共同話題」，雲尼斯達萊曾經喺英超創造連續10場入波紀錄，但呢個紀錄喺2015年，就係被占美華迪連續11場入波打破。