利物浦搶購屈堅斯　頂替達雲紐尼斯

利物浦今個夏天迎嚟大改革，新領隊施洛上任後志切重整鋒線，英國《太陽報》爆料，施洛已鎖定阿士東維拉前鋒奧尼屈堅斯為頭號目標，希望以呢位英格蘭國腳代替烏拉圭前鋒達雲紐尼斯。

達雲紐尼斯今季英超只入11球，最後10場賽事全「食白果」，令佢受到球迷口誅筆伐，呢位烏拉圭前鋒更一度將社交網入面嘅紅軍相片刪除，雖然之後已經「回復正常」，但佢不似預期嘅表現就令施洛擔心，而奧尼屈堅斯就被視為代替佢嘅最佳人選。

28歲嘅奧尼屈堅斯今季英超入19球，亦入選英格蘭歐國盃大軍，不過利物浦嘅收購行動困難重重，特別係維拉下季會出戰歐聯，肯定唔會輕易放人，而且屈堅斯同維拉嘅合約去到2028年，預計轉會費會破1億鎊大關。