卡雲尼宣布結束國家隊生涯　無緣美洲盃

烏拉圭神鋒卡雲尼正式宣布結束國家隊生涯，意味呢位37歲射手將唔會出戰6月喺美國舉行嘅美洲國家盃賽事。

卡雲尼透過社交網發文話：「我想停下來，今日言語雖少，但感觸好深，感謝多年來同我一齊走過呢段路嘅每一個人，無疑係一段珍貴歲月，有好多話要講，有好多故事想分享，如今想專注球會賽事，決定退出國家隊，但我嘅心永遠追隨烏拉圭。」

卡雲尼2008年首次代表烏拉圭以來，總共上陣136場入58球，屬於國家隊入波第2多嘅球員，僅次於入68球嘅蘇亞雷斯，並曾經協助烏拉圭奪得2011年美洲國家盃冠軍。卡雲尼最近1次為烏拉圭比賽，已經係2022年世界盃分組賽對加納，雖然佢有份入選出戰今屆美洲國家盃33人初步名單，但最終都係決定退出。

卡雲尼上年夏天離開西甲球隊華倫西亞，加盟阿甲勁旅小保加，至今上陣34場入15球，協助小保加打入上屆南美自由盃決賽，可惜不敵富明尼斯。