【官宣】曼聯簽「星二代」　跑100米只需11秒

曼聯新股東拉特克利夫銳意為球隊推行年輕化及本土化，會方已為將來規劃，宣布簽入葉士域治14歲新星施華麥薩斯，呢位小將屬於「星二代」，爸爸係前諾定咸森林前鋒安梳爾。施華麥薩斯亦盡得父親優良遺傳，即使只係14歲，但速度非常快，跑100米只需11.2秒。

曼聯球探積極物色具潛力小將，早於3月已斟傾施華麥薩斯，現時終於完成手續，正式宣布簽入佢。施華麥薩斯喺簽約儀式上舉起「傳奇7號」，可見會方非常重視佢，相信施華麥薩斯加盟曼聯U14後，將會身穿7號成為主力。

施華麥薩斯話：「加盟曼聯對於我同家人來講，係一件非常驕傲嘅事，感謝曾經幫助我嘅人。」施華麥薩斯嘅爸爸安梳爾亦有陪同囝囝出席簽約儀式，並將合照上載到社交網，大讚施華麥薩斯成「魔」係了不起嘅事，永遠支持佢。

施華麥薩斯屬於進攻球員，速度快、彈跳力強，據悉佢跑100米只需11.2秒，跳遠可以跳到5.37米，對於14歲小朋友而言，呢兩個數字喺同齡球員之中，屬於大超班。