國米中堅開刀　退出意大利歐國盃名單

正在備戰歐國盃決賽周嘅意大利遭受打擊，中堅法蘭斯高阿沙比因為需要接受手術，根治傷患，被逼退出大軍名單，無緣今屆歐國盃，領隊史巴列堤已經補選祖雲達斯中堅加迪填補位置。

法蘭斯高阿沙比今季為國際米蘭上陣29場意甲入3球，屬於球隊捧聯賽冠軍嘅主力，亦係意大利奪得上屆歐國盃冠軍嘅成員，佢原本好大機會以正選為意軍出戰今屆賽事，但係呢位36歲老將近日感到腹股溝痛楚，最終決定開刀治療，無奈退隊。

至於獲補選嘅加迪僅有3次國家隊上陣經驗，呢位25歲中堅今季為祖雲達斯踢32場意甲入4球，助攻力不俗，並協助祖記奪得意大利盃冠軍。意大利現時維持30人初步名單，最後需要裁減至26人參加歐國盃決賽周。