摩連奴即將轉戰土超　簽約2+1

摩連奴被羅馬辭退後搵到新工，據報土超豪門費倫巴治同「寸王」達成協議，簽約2+1，最快24小時內官宣。

回復自由身嘅摩連奴收到唔少聘約，又不時談論前球會曼聯同熱刺，最近傳出沙特新升班球隊艾卡迪西亞開出1.5億歐元巨額年薪肥約，不過摩dad最終選擇留喺歐洲，揀咗費倫巴治，來季重返歐聯賽場。

著名記者迪馬濟奧報道，費倫巴治體育總監馬里奧白蘭高同屬葡籍，同摩連奴敲定今次交易，合約為2+1，《阿斯報》報道，摩連奴團隊2年薪酬高達4,000萬歐元(約3.4億港元)，雖然同沙特天價合約相差極遠，但「寸王」唔想為錢打工，似乎仲有嘢想做。

61歲嘅摩連奴執教生涯已經贏過葡超、英超、意甲、西甲，歐洲賽場就贏過歐聯、歐霸盃同歐協聯，如果再幫費倫巴治贏土超冠軍，佢嘅冠軍版圖又會擴大。

費倫巴治現時人腳唔差，擁有迪斯高、中場費特、杜辛泰迪治、巴舒亞伊等，摩連奴駕臨，相信會繼續增兵。