歐聯決賽　皇馬「3老」挑戰C朗馬甸尼紀錄

多蒙特同皇馬將於周日(2日)凌晨歐聯決賽交鋒，根據歐洲足協公布統計數據，自1992/93年球季歐聯改制後，C朗同馬甸尼屬於決賽上陣次數最多嘅球員，同樣有6次。皇馬現時陣中3位球員卻奧斯、莫迪歷、丹尼爾卡華積都曾經5次踢歐聯決賽，換言之，3人只要今場披甲，就可以追平C朗同馬甸尼嘅紀錄。

過去10屆歐聯，皇馬捧5次冠軍，隊內唔少老將屬於歐聯決賽常客，莫迪歷、丹尼爾卡華積5次歐聯決賽上陣，都係效力皇馬時期。至於卻奧斯有1次為拜仁踢歐聯決賽，4次代表皇馬，呢位德國國腳踢完今場比賽，就會離開皇馬，令佢今次追平歐聯決賽最多上陣紀錄更加有意義。