2屆決賽入波　雲尼斯奧斯預訂金球獎？

自C朗拿度、美斯離開歐洲球壇後，唔少評論認為基利安麥巴比、艾寧夏蘭特將成金球獎主角，不過23歲嘅雲尼斯奧斯祖利亞就用成就證明，佢都係金球獎競逐人選。今場歐聯決賽入波，令佢追平C朗、美斯嘅歐聯入球紀錄，難怪被捧為下屆金球獎大熱人選。

皇馬今場進攻表現麻麻，不過雲尼斯奧斯每次拎波都有威脅，全場8次成功扭波過人，喺歐聯決賽史上只有朗拿甸奴、美斯同C朗做過；佢繼2年前歐聯決賽對利物浦一箭定江山後，再次喺決賽入波，亦同C朗、魯爾、加里夫巴利同沙治奧拉莫斯睇齊，成為第5個喺2屆歐聯決賽入波球員。

雲尼斯奧斯賽後興奮表示：「又喺決賽入波實在難以置信，同上次一樣難以形容，今場雖然遇上困難，但我哋最終都係冠軍，好開心可以第2次捧盃。我愛皇馬，我哋永遠為勝利而戰，多謝會長一直支持，佢喺我好細個就用重金簽我，依家我覺得自己物有所值。」雲尼斯奧斯嘅演出獲得一致肯定，「大哨」朗拿度貼出同師弟嘅合照，並配以「金球獎」嘅字句。