2届决赛入波　云尼斯奥斯预订金球奖？

自C朗拿度、美斯离开欧洲球坛后，唔少评论认为基利安麦巴比、艾宁夏兰特将成金球奖主角，不过23岁嘅云尼斯奥斯祖利亚就用成就证明，佢都系金球奖竞逐人选。今场欧联决赛入波，令佢追平C朗、美斯嘅欧联入球纪录，难怪被捧为下届金球奖大热人选。

皇马今场进攻表现麻麻，不过云尼斯奥斯每次拎波都有威胁，全场8次成功扭波过人，喺欧联决赛史上只有朗拿甸奴、美斯同C朗做过；佢继2年前欧联决赛对利物浦一箭定江山后，再次喺决赛入波，亦同C朗、鲁尔、加里夫巴利同沙治奥拉莫斯睇齐，成为第5个喺2届欧联决赛入波球员。

云尼斯奥斯赛后兴奋表示：“又喺决赛入波实在难以置信，同上次一样难以形容，今场虽然遇上困难，但我哋最终都系冠军，好开心可以第2次捧杯。我爱皇马，我哋永远为胜利而战，多谢会长一直支持，佢喺我好细个就用重金签我，依家我觉得自己物有所值。”云尼斯奥斯嘅演出获得一致肯定，“大哨”朗拿度贴出同师弟嘅合照，并配以“金球奖”嘅字句。