完成心願　安察洛堤留在皇馬退休

皇馬教練安察洛堤刷新自己保持嘅紀錄，成為史上首位5奪歐聯冠軍嘅主帥，亦係第3次率領皇馬獲得呢項大賽錦標。呢位64歲意大利名帥早前透露，贏埋今屆歐聯冠軍，就會執教「銀河艦隊」至退休，意味好可能2026年夏天約滿收山。

安察洛堤被譽為「歐聯專家」，帶領8次支唔同球隊參加歐聯，總共出戰204場、贏115場、6次入決賽、5次捧盃，呢5項紀錄都係史上第一，仲未計佢球員時代曾經2次協助AC米蘭奪冠，換言之，「肥安」球員及教練生涯已經7次捧歐聯冠軍，實在非常誇張。

早前安察洛堤透露，皇馬將會係佢最後一支執教球隊：「再贏多1次歐聯冠軍，我應該會留喺皇馬退休，相信咁做係好自然嘅事。」安帥上年年底拒絕巴西國家隊邀請，決定同皇馬續約至2026年夏天，現已達成贏歐聯冠軍願望，估計佢好大機會2年後約滿退休。

至於講到今場決賽，安察洛堤承認對手多蒙特上半場表現比較好，中場休息時同球員商量後，作出針對性部署，特別係防守對方死球非常成功，成為贏波關鍵。