大團圓！莫迪歷續約皇馬　爭第7個冠軍

皇馬球星莫迪歷嘅續約拉鋸多時，隔住喺歐聯決賽封王後仍有大團圓結局，會長皮里茲同莫迪歷都證實將會續約1年。皮里茲表示：「莫迪歷肯定會再幫皇馬踢多年，冇人會懷疑，佢係皇馬傳奇之一，好開心佢可以再效力多1季。」

莫迪歷效力皇馬12個球季，歐聯戰績為6次冠軍、4次入4強同2次入16強，喺5個紀錄性6奪歐聯冠軍嘅球當中，只有真圖、莫迪歷同丹尼爾卡華積係6場決賽都有份上陣。今次佢再續約皇馬，有機會挑戰7奪冠軍奇迹，莫迪歷表示：「個人7次歐聯？可以呀！但係依家先享受下先。」

38歲嘅莫迪歷亦向皇馬表明心迹：「皇馬係我一生嘅球會，就好似屋企一樣，我講過好多次想喺呢度掛靴。關於續約，幾日內就會有公布，我已經聽厭咗其他人話我年紀大，我嘅比賽水平仍然好高，其他人點講都影響唔到我。」