曉姆斯將決定去向　或轉投AC米蘭

多蒙特中堅曉姆斯同隊友馬高列奧斯一樣，繼2013年之後再次喺歐聯決賽飲恨，呢位35歲老將同樣將於今夏約滿，佢有意作出突破，希望掛靴前，首嘗出國搵食滋味，盛傳意甲勁旅AC米蘭計劃邀請曉姆斯加盟。

雖然曉姆斯已年屆退役年齡，但寶刀未老，今季為多蒙特各項事上陣40場，並有4球進帳，包括歐聯4強次回合作客巴黎聖日耳門，攻入全場唯一入球。根據《Squawka》統計，曉姆斯成為繼2009/10年球季盧斯奧之後，史上第2位單屆歐聯有50次成功搶截嘅球員。

原本外界以為德國國家隊主帥拿高斯文會徵召曉姆斯踢歐國盃，但卻事與願違，無緣入選。因此，曉姆斯可以專心處理去留問題，佢透露有3項選擇：「我一係同多蒙特續約，一係掛靴，或者轉投其他聯賽球隊，但一定唔會去美職，或者類似聯賽，我要留喺歐洲，主要因為考慮家庭因素。」

曉姆斯18年球員生涯只曾效力拜仁慕尼黑同多蒙特，據悉佢有意去其他歐洲聯賽搵食，AC米蘭最有興趣簽佢，祖雲達斯亦可能加入爭奪。