晓姆斯将决定去向　或转投AC米兰

多蒙特中坚晓姆斯同队友马高列奥斯一样，继2013年之后再次喺欧联决赛饮恨，呢位35岁老将同样将于今夏约满，佢有意作出突破，希望挂靴前，首尝出国搵食滋味，盛传意甲劲旅AC米兰计划邀请晓姆斯加盟。

虽然晓姆斯已年届退役年龄，但宝刀未老，今季为多蒙特各项事上阵40场，并有4球进帐，包括欧联4强次回合作客巴黎圣日耳门，攻入全场唯一入球。根据《Squawka》统计，晓姆斯成为继2009/10年球季卢斯奥之后，史上第2位单届欧联有50次成功抢截嘅球员。

原本外界以为德国国家队主帅拿高斯文会征召晓姆斯踢欧国杯，但却事与愿违，无缘入选。因此，晓姆斯可以专心处理去留问题，佢透露有3项选择：“我一系同多蒙特续约，一系挂靴，或者转投其他联赛球队，但一定唔会去美职，或者类似联赛，我要留喺欧洲，主要因为考虑家庭因素。”

晓姆斯18年球员生涯只曾效力拜仁慕尼黑同多蒙特，据悉佢有意去其他欧洲联赛搵食，AC米兰最有兴趣签佢，祖云达斯亦可能加入争夺。