車路士今夏第一簽　富咸中堅即將加盟

車路士迅速增兵得手，根據「轉會權威」記者羅曼諾(Fabrizio Romano)爆料，呢支英超豪門已經斟掂富咸中堅艾達拉比奧約，只要呢位26歲後衞通過體測，就會正式上「車」。

車路士以往慣用重金收購球星，但今次好慳家，向約滿自由身離開富咸嘅艾達拉比奧約埋手，唔需要支付轉會費。據悉雙方早前已經達成加盟口頭協議，正在安排進行體測，如無意外下周簽約，艾達拉比奧約將會成為車路士今夏第一簽。

身高1米96嘅艾達拉比奧約出身於曼城青訓系統，制空力強，今季為富咸上陣20場英超有2球進帳，車路士老將堤亞高施華早前離隊之後，球隊需要補充新中堅，艾達拉比奧約上「車」，正好可以填補空缺。