摩連奴隆重登場　唔熟唔食打2舊部主意

「寸王」摩連奴周日(2日)正式喺費倫巴治亮相，呢位冠軍教頭空降伊斯坦布爾後，獲過萬名球迷到場支持，摩連奴亦表現得勁High。據報佢嘅轉會目標已鎖定兩名舊部，希望將盧卡古或保羅戴巴拿帶去土耳其。

摩連奴今年初被羅馬炒魷後，早前簽約費倫巴治2年，周日佢飛抵土耳其即獲大批球迷接機，之後坐直昇機空降費倫巴治主場，過萬球迷放晒煙花熱烈歡迎，摩連奴亦揮舞球會波衫回應：「多謝大家嘅愛戴，通常教練要贏波之後先會得到球迷嘅愛，但我未贏波已經得到，所以我覺得自己有更大責任，由呢刻開始我屬於費倫巴治家庭，呢件波衫就係我嘅皮膚！」

費倫巴治喺23/24球季排土超第2位，摩連奴志切幫球隊重奪冠軍，據報佢睇中啱啱嗰季教羅馬嘅2名箭頭盧卡古同保羅戴巴拿，其中盧卡古係由車路士外借，預計轉會費2,000萬鎊，而保羅戴巴拿合約亦有1,000萬鎊買斷條款，至於艾納斯前鋒塔利斯卡就係後備目標。