柏基達造波案新證供　曾要求免役被拒

韋斯咸中場盧卡斯柏基達上月被英格蘭足總檢控，指佢喺4場聯賽入面故意拎黃牌，令朋友喺投注獲益。呢位巴西國腳已否認指控，據報近日更提出證供，指佢喺其中一場涉案賽事，曾向當時領隊莫耶斯要求免役，如果佢存心「造波」，就唔會主動要求唔落場比賽。

英國《太陽報》報道，柏基達喺周一(3日)回應指控嘅死線前提出新證供。上年8月對般尼茅夫嘅英超開咧戰，柏基達喺最後補時因手球食黃牌，係足總指控4場「造波」賽事之一，但柏基達就提出，佢當時正同曼城斟介，所以向莫耶斯提出免役，以免受傷而影響轉會，不過要求被莫耶斯拒絕，而且佢喺比賽70分鐘之後，亦多次向場邊要求換人不果。柏基達強調呢啲舉動，證明佢並冇打算故意拎黃牌。

柏基達喺對般尼茅夫後，就被爆出受到英足總調查嘅消息，曼城亦煞停收購計劃。早前有傳曼城準備再次啟動柏基達合約內8,500萬鎊買斷條款，但隨住英足總正式檢控，而且可能面臨終身停賽處分，曼城將會再次擱置收購。