土耳其绝代双骄　耶迪斯唔差过古拿

土耳其喺今届欧国杯嘅表现备受期待，因为佢哋有唔少天才冒起，19岁嘅艾达古拿季尾喺皇家马德里大爆发，赢到唔少粉丝；其实效力祖云达斯嘅19岁前锋基伦耶迪斯，今年喺意甲亦大放异彩，据报祖云达斯即将同佢续约，仲答应畀佢畀继续10号波衫。

耶迪斯2年前由拜仁慕尼黑青年军转投祖记，上年底获提拔上一队后坐火箭上位，各项赛事上阵32场攻入4球，新教练莫达已将佢列为3个“非卖品”之一。据报耶迪斯已同意续约至2029年，祖记更答应畀佢继承巴治奥、迪比亚路等着过嘅10号波衫。祖记目前“挂名”10号球员，系正坐4年波监嘅保罗普巴。

土耳其领队蒙迪拿对耶迪斯亦有好高期望：“耶迪斯系个好聪明嘅细路，佢好大机会喺未来一段长时间位处顶尖，依家开始佢要改变自己嘅思维，要学识点样处理成功同期望，展开另一段截然不同嘅足球生涯。”