【官宣】麦巴比签约5年　皇马组银河级锋线

千呼万唤，“新球王”基利安麦巴比正式加盟皇家马德里！2日前赢得欧联冠军嘅皇马，周二(4日)凌晨宣布同法国前锋麦巴比签约5年，虽然佢系以自由身加盟，但皇马将畀佢超过1亿欧元签字费。皇马本身已有祖迪比宁咸、云尼斯奥斯祖利亚同洛迪高高斯，再加埋麦巴比同巴西天才前锋恩迪克，打造“银河级”梦幻锋线！

麦巴比上月宣布夏天约满后，将结束7年巴黎圣日耳门(PSG)生涯，佢会转投皇马系公开嘅秘密，不过皇马周二官方宣布嗰阵，仍然引起大批球迷关注令官网“死机”。据报麦巴比签约5年，年薪虽然由喺PSG嘅2,500万欧元大幅减至1,500万欧元，但仍然系皇马最高薪球员，而且仲会分5年得到1亿欧元签字费，以及保留8成肖像权收入。

麦巴比于官宣后，喺社交网贴出佢细个着住皇马外套，到访皇马基地兼同偶像C朗拿度见面照片，佢话：“梦想成真！好开心同好荣幸加盟我嘅梦想球会，冇人会明白我依家有几兴奋，心急想同球迷见面，多谢大家支持，皇马加油！”C朗随后亦喺社交网回应：“依家轮到我做观众，期待见到你燃亮巴拿贝球场！”

皇马曾经打造由朗拿度、施丹、费高、碧咸、卡路士同奥云嘅“6条烟”经典，被誉为球坛“银河舰队”；之后亦有宾施马、加里夫巴利同C朗拿度嘅“BBC锋线”；今次25岁嘅麦巴比加盟，同本身嘅云尼斯奥斯(23岁)、祖迪比宁咸(20岁)、洛迪高高斯(23岁)、艾达古拿(19岁)合作，加上即将归队嘅巴西17岁国脚恩迪克，呢条超年轻攻击线被睇好将出产多位未来“金球奖”得主，令人非常期待。