【官宣】馬利斯卡成車路士新帥　仿傚曼城戰術

車路士正式宣布聘請李斯特城主帥馬利斯卡擔任領隊，雙方簽約5年，呢位44歲意大利籍少帥師承曼城領隊哥迪奧拿，據悉佢將仿傚「藍月亮」戰術，屆時「雙藍」交鋒，師徒對決肯定有好戲睇。

馬利斯卡上年夏天成為李斯特城領隊，僅執教1季就率領球隊奪得英冠冠軍，下季重返英超，教波能力備受認同，因而引吸各大球會關注。英國《每日郵報》指車路士今次向李斯特城支付1,000萬鎊(約1億港元)賠償金，成功挖角請到馬利斯卡，並且簽下5年長約，似乎想將賠償金攤分入帳，減低財政違規機會。

馬利斯卡做過曼城青年軍教練，亦曾擔任哥迪奧拿助教，英國傳媒分析指佢將會倣效曼城433陣式，並安排左右後衞不時轉換位置，扮演防守中場角色，預料可以提升車路士攻力。據悉車仔球員知道馬利斯卡加盟之後，都感到興奮，認為佢可以成為另一位哥迪奧拿，帶領球隊復興。