學偶像C朗　麥巴比將先着9號

根據西班牙《阿斯報》爆料，基利安麥巴比加盟皇馬後，會方將於周三(5日)開始售賣呢位法國射手嘅球衣，預料將掀起搶購潮。麥巴比將會着皇馬邊個號碼波衫，備受關注，由於佢慣着嘅7號同10號已名花有主，估計好可能仿傚偶像C朗當年加盟皇馬首季着住9號先。

基利安麥巴比之前效力巴黎聖日耳門着7號，踢法國國家隊着10號，但皇馬現時呢兩個號碼分別屬於雲尼斯奧斯祖利亞、莫迪歷，傳統上代表前鋒嘅9號球衣懸空，所以推斷麥巴比下季會着9號，等1年之後莫迪歷約滿離隊，再改着10號。

值得一提，C朗2009年夏天加盟皇馬，因為當時7號球衣屬於魯爾，佢着住9號先，等1季之後魯爾離隊，再接過7號球衣，麥巴比應該會仿傚C朗做法，唔會勉強「橫刀奪愛」。