紐卡素斟掂般茅中堅　佢係主帥嫡系

失落歐洲賽資格嘅紐卡素，近日終於有好消息，就係斟掂般尼茅夫25歲中堅萊特基利，仲要係免費加盟，預計最遲7月完成交易。

「轉會專家」羅曼諾報道，紐卡素已經斟妥英格蘭中堅萊特基利，現時正處理合約細節，預計於幾星期內完成交易。

其實本來紐卡素斟介目標係富咸中堅艾達拉比奧約，可惜臨門一腳被車路士截胡，該球員近日已完成體檢，即將加盟車路士，而且同樣係免轉會費。

至於萊特基利，紐卡素就唔擔心會畀人攔途截劫，因為萊特基利係紐卡素主帥艾迪侯域執教般尼茅夫時提拔嘅小將，可以話係艾迪侯域嘅嫡系，今次免費加盟紐卡素，畀人搶走機會不大。

萊特基利係左腳中堅，可兼任左閘，今季上陣25場入1球1助攻，在德國《轉會市場》身價為1,800萬歐元(約1.53億港元)。