迪布尼考慮去沙特挖金：踢兩年賺得多過近15年總和

近期不時傳出有沙特阿拉伯球會計劃簽入曼城中場奇雲迪布尼，呢位即將33歲嘅比利時國腳開始心動，話可以考慮轉會，因為效力沙特球會兩年薪酬，隨時多過自己近15年人工總和。

奇雲迪布尼接受比利時傳媒訪問時話：「去沙特？到咗我呢個年紀，必須持開放態度，來到球員生涯尾聲可以賺咁多錢，去當地踢兩年，隨時多過我15年職業球員生涯人工總和，必須認真考慮。我老婆都接受去其他國家生活，家人愈來愈多討論呢個問題，我仲有1年合約，大仔已經8歲，佢對英國以外嘅世界一無所知，佢仲問我會效力曼城幾耐。」

沙特聯賽總監艾文拿路曾經表示，奇雲迪布尼屬於賽會最希望引入嘅球星之一，《TeamTalk》指艾納斯有興趣簽入奇雲迪布尼，同C朗、沙迪奧文尼組成「夢幻三叉戟」，如果奇雲迪布尼接受邀請，有機會獲得2億歐元(約17億港元)年薪。