世盃外　安帥離任後首擊　港隊主場撼伊朗　

香港男子足球代表隊周四（6日）出戰「2026世界盃暨2027亞洲盃聯合外圍賽第二圈」E組第5輪賽事，坐鎮香港大球場硬撼伊朗。兩隊世界排名相差137位，但早前在亞洲盃交手，港隊僅負1球，今次坐擁主場之利之下，隨時再踢出驚喜。同時今場亦屬港隊在主帥莊恩安達臣離任後首場賽事，表現令人期待！（港台電視32周四晚上8時直播）

港隊近4次在國際A級賽，面對伊朗全數落敗，剛勇奪4料足球先生的陳肇鈞（Philip），亦坦言這支西亞勁旅絕不容易應付：「可能喺亞洲盃反映唔到，但伊朗絕對係我對過最強嘅國家，踢得特別吃力。佢哋踢法夠機動，體力、身型同大賽經驗都優勝好多。」港隊雖然已篤定出局，加上賽前臨陣易帥，但Philip提醒隊友仍要保持積極心態：「希望球員唔好因為出局，或者球季啱啱完就鬆懈。另外，安達臣當然係好有感染力，但其實落到場都係靠球員自己，我哋做番平常嘅嘢就得。」

港隊防線與首循環相比面目全非，門將謝家榮與3名後防勞烈斯、梁諾恆和李毅凱，是次齊齊落選，防守中場陳俊樂卻稱不太擔心：「唔驚嘅，咁仲有其他好多好球員喺到，好似Leon（鐘樂安）今季表現都好好。」 港隊今場將由暫代主教練盧斯爾頂替安帥領軍，惟「樂仔」認為問題不大，對伊朗目標有分落袋：「咁佢大致上都係沿用番安達臣嘅逼搶踢法，適應上唔困難。今場唔係完全冇機會搶分嘅，好似亞洲盃都係僅負1球，人哋可能會大意、輕敵，盡力去踢好就得。」

至於暫代主教練盧斯爾在記招上，則表示球隊今場會沿用逼搶戰術，又提到梁諾恆和艾華頓兩名主力缺陣的原因：「Jacky（梁諾恆）因為家庭原因退隊，而艾華頓就一早同安達臣達成共識，選擇避戰。」而另一有份出席記招的隊長葉鴻輝，則承認球隊狀態與亞洲盃有分別，惟仍會嘗試在伊朗身上搶分，同時他又呼籲更多球迷入場打氣，以發揮主場威力：「同亞洲盃嗰場比賽唔同，就係我哋冇一個月時間去集訓，今次得幾日。同埋去到季尾，部分球員都有傷病，今次陣容唔太完整。」對於港隊可能最後一次在香港大球場作賽，「阿輝」亦有感而發：「大球場一向見證住香港足球唔同年代嘅高低，有好多好好嘅回憶，但時代變遷都要去接受，嚟緊都有啟德體育園，會繼續去展望將來。」

世界排名20位的「亞洲二哥」伊朗，賽前已篤定晉級，但多名在亞洲頂級聯賽打滾的主力，包括羅馬中鋒阿斯蒙、波圖射手泰尼米，以及賓福特中場沙文高度斯等今次悉數在陣，主教練阿加揚尼安強調球隊絕不會輕敵：「港隊近年進步好大，上次亞運交手都好難踢，我哋會認真對待今場比賽，同埋吸收經驗，喺埋門上多加改善。」除此之外，阿加揚尼安又不忘感謝安達臣過去為港隊的付出，並祝願他一路順風。

港隊預計陣容

1.葉鴻輝

21.茹子楠 5.艾里奧 3.周緣德 17.陳晉一

8.陳俊樂 6.胡晉銘 16.陳肇鈞

13.杜俊暉 9.安永佳 10.史提芬彭利拿