南韓新帥重返新加坡　誓要雪前恥

南韓自2月炒咗領隊奇連士文，至今仍未聘請正式主帥，繼搵名宿黃善洪臨時領軍出戰3月2場世界盃外圍賽後，上月又換人，請來另一位前國腳金度勳擔任看守領隊，應付6月2場世盃外賽事。呢位53歲名帥領軍第一擊，就要重返「失意地」鬥新加坡國家隊，誓要一雪前恥。

金度勳2021年5月成為新加坡球會獅城水手教練，並率領球隊奪得聯賽冠軍，原本發展順風順水，但2022年7月出戰淡濱尼流浪，金度勳同對方助教費倫甸發生衝突，被罰停賽3場，佢坐完波監後憤而辭職，至於是否受到會方壓力而劈炮，就不得而知。

金度勳離開新加坡後，接近2年冇教波，估唔到重執教鞭第1場就要重返新加坡比賽，當然要把握機會做齣好戲，省番靚金漆招牌。由於金度勳非常熟悉新加坡球員，應該可以作出針對性部署，打響出山第1炮。