艾納斯再簽「星」　請希亞路做總監

沙特阿拉伯豪門艾納斯又獲得「星級」人物加盟，但今次唔係簽球員或教練，而係聘請西班牙名宿希亞路擔任體育總監，以呢位一代鐵衞嘅崇高地位，有助艾納斯招攬更多猛將來投。

現年56歲嘅希亞路球員時代曾經效力皇馬14年，捧過5次西甲及3次歐聯冠軍等錦標，退役後亦做過「銀河艦隊」助教。2018年世界盃舉行前夕，希亞路臨危受命，接手執教西班牙國家隊，但16強止步，佢亦離任。

艾納斯發表聲明，稱讚希亞路擁有珍貴球壇經驗，可以帶領球會取得成功。艾納斯近年不斷簽入球星，包括C朗、沙迪奧文尼，希亞路今次加盟擔任管理層，相信會利用佢嘅人脈，邀請更多球星加盟。

其實希亞路唔係第1次去中東搵食，佢離開皇馬之後，曾於2003/04年球季效力卡塔爾球隊艾雷恩，上陣19場入3球，今次去沙特「挖金」，應該可以迅速適應當地生活。