麦巴比弗爆！创造3球率法国大胜

日前宣布加盟皇家马德里嘅基利安麦巴比，依家正专注为法国备战欧国杯，周四(6日)凌晨热身赛展示弗爆状态，交出1射2传包办3个入波，率领法国主场3比0大破卢森堡，并且超越施丹、亨利2大传奇嘅助攻纪录，领队迪甘斯赛后大赞佢系法国嘅“神奇领袖”。

法国夏天热身赛第1击，啱啱转投皇马人气爆灯嘅麦巴比正选上阵，佢嘅表现非常活跃，早段左路传中畀基沙文射中柱，43分钟麦巴比左路杀落底线传中，高路梅安尼接应顶入；下半场继续系麦巴比玩晒，70分钟助攻约拿芬卡拉奥斯轰入世界波，完场前5分钟再接应巴高拿传送射入，个人创造3个入球。

麦巴比今场交出2次助攻后，国家队累积28次助攻，超越施丹同亨利(各26次)升上历史助攻榜第2位，仅次于30次助攻嘅基沙文。迪甘斯赛后表示：“麦巴比系神奇领袖！佢嘅身体唔习惯今季喺巴黎圣日耳门得咁少上阵时间，所以佢想做晒所有嘢嚟填补。”

对于法国嘅状态，迪甘斯亦好满意：“今场系好好嘅演练，我哋唔会太兴奋，有部份位置需要再调整，进攻上面我哋有好多元化。”前锋基奥特今场后备上阵，以37岁249日之龄成为法国史上最老上阵球员。法国周一(10日)凌晨会约战加拿大，作为决赛周前最后一场热身赛。