【有片】仲踢得！艾历臣1传1射率丹麦赢波

基斯甸艾历臣宝刀未老！星期四(6日)凌晨国际热身赛，丹麦主场2比1击败瑞典，喺曼联沦为大后备嘅老将艾历臣，交出1传1射成功赢波最大功臣，包括完场前4分钟嘅精彩绝杀，用行动证明自己仲有好大影响力。

艾历臣喺曼联失去正选，啱啱嗰季只踢过12场联赛正选，不过返到国家队就继续担大旗，今场2分钟就角球助攻贺积查治顶入，虽然瑞典9分钟就由阿历山大伊沙克追平，不过艾历臣喺86分钟禁区外推顺轰入世界波，为丹麦绝杀赢波。

艾历臣精彩绝杀：https://twitter.com/i/status/1798428319815434407　

32岁嘅艾历臣赛后表示，今场死球助攻比入波更开心：“用死球入波非常美妙，我哋最近嘅死球战术收唔到效果，我觉得我可以作出贡献，而能够成为决定比赛嘅人，感觉好正。”艾历臣喺上届欧国杯首场分组赛，因心脏病发晕倒球场，并缺席当届馀下赛事，今届将再以队长身份再战欧国杯。