貪佢哋夠老？曼聯同元老孖寶續約

曼聯官網公布新球季變動，安東尼馬迪爾、華拉尼同班頓威廉斯正式離隊，外借基達菲嘅格連活特歸隊，同時宣布同後防兩大元老湯希頓及莊尼伊雲斯續約。

36歲莊尼伊雲斯上季重返曼聯大家庭，最初只係跟操，然後簽臨時短約，點知踢踢吓，曼聯後防傷兵不斷，莊尼伊雲斯多次正選登場，埋單全季上陣30場，錄得1個助攻，仲捧走英足盃。結果，莊尼伊雲斯率先獲得續約，哈利馬古尼都未必留隊，但佢就可以續留曼聯。

38歲嘅湯希頓2021年重返曼聯，成為更衣室嘅定海神針，曼聯上季換龍門，改由奧拿拿把關後表現差勁，奧拿拿同坦哈格都承受極大壓力，今季結束，奧拿拿同坦哈格都前途未卜，但湯希頓則率先續約肯定留低，而長遠佢仲會係球隊嘅守門員教練。

至於格連活特名字雖然重新出現在曼聯官網，不過只係過場形式，曼聯球迷唔接受「綠木」回歸，曼聯亦等待合適買家出價，將佢賣走，如果搵唔到買家，就會繼續將佢外借。