英足總公布　麥迪臣鍾斯離隊

英足總公布，占士麥迪臣及居迪斯鍾斯已離開英格蘭大軍，並已被通知不會入選歐國盃26人名單，感謝兩位參加訓練，稍後「三獅兵團」仲會踢走5個。

修夫基今次英格蘭點兵搵咗33人，共有7人將會落選，而占士麥迪臣同居迪斯鍾斯成為首批出局球員，占士麥迪臣離隊後在社交網回應，並承認自己下半季傷愈後，未能在熱刺踢出自己滿意表現，不過佢亦指出：「我一直係外圍賽擔演重要角色，但既然領隊已經決定咗，我亦會尊重，並深信自己會再返嚟，祝大家喺德國一切順利，希望佢哋捧盃而回。」

至於居迪斯鍾斯，今次係首次獲得修夫基徵召，但上場熱身賽對波斯尼亞未獲派上陣，即係話佢到現時仍然未為大國腳上陣過，由於佢祖籍尼日利亞，「超霸鷹」又可以乘機挖角。