19比1！英超投票大比數通過繼續用VAR

英超年度會議周四(6日)舉行，當中最矚目嘅一項議案，就係由狼隊提出24/25球季開始廢除VAR，呢項動議需要英超20隊當中嘅最少14隊支持，先可以獲得通過，不過結果卻係一面倒，19隊都反對廢除VAR。狼隊對結果表示失望，但就歡迎英超對VAR提出嘅改革建議。

廢除VAR議案以1比19大比數被否決後，狼隊發聲明話：「我哋對投票結果感到失望，但會接受其他球會嘅決定，而且獲保證英超賽會將認真聆聽球會同球迷嘅意見，對於英超提出改善VAR嘅建議，我哋表示歡迎。狼隊仍然相信冇VAR嘅英超會更加優秀，但都認同改善VAR會提高賽事公正同完整性。」

英超賽會成功保留VAR後，已即時提出多項改善方案，希望增加審核嘅速度、準確度同透明度，而早前落實24/25球季引入「半自動越位檢測系統」，相信會有助提高比賽嘅流暢度。