英超6隊面臨「爆煲」　今個月內緊急賣人

英超嘅財政「金剛箍」愈收愈緊，據英國《天空體育》報道，車路士、阿士東維拉、紐卡素、愛華頓、諾定咸森林同李斯特城6隊，喺「盈利及可持續發展條例」下處於「爆煲」邊緣，佢哋需要喺6月30日前緊急賣人「整靚盤數」，否則可能步愛華頓同森林被扣分後塵。

英超「盈利及可持續發展條例」規定，球會喺3年內唔能夠蝕錢超過1.05億鎊，《天空體育》消息指車路士等6隊都超標，喺6月30日嘅財政年度結算前，要透過賣人增加收入嚟填數，上年車路士就係喺6月底死線前，賣走夏維斯同美臣蒙特成功「補鑊」。

如果報道屬實，今個月轉會窗將會非常熱鬧，車路士嘅干拿加歷查、維拉前鋒奧尼屈堅斯、紐卡素中場般奴古馬雷斯、愛華頓中場阿馬度奧拿拿等都係搶手貨，不過6月底嘅限期撞正歐國盃同美洲盃，令轉會難度增加唔少，未來1個星期可能「有賣趁手」。