美斯未言退 暗示想踢2026世界盃

2024年06月08日 19:01
東網電視
更多新聞短片
美斯有心有力。(Getty Images)
阿根廷正在備戰美洲國家盃,球王美斯接受傳媒訪問時,透露如果身體狀態許可,唔排除會繼續為國效力,出戰2026年世界盃決賽周。
將於6月24號年滿37歲嘅美斯被問到有冇打算2026年協助阿根廷衞冕世界盃,佢話:「需要根據到時身體感覺而定,距離下屆世界盃仲有好多時間,我唔知道2026年6月,自己身體會有咩感覺,雖然年齡只係一個數字,但亦會反映現實情況,會唔會踢下屆世界盃,有好多因素要考慮。我現時踢美職,已經唔同以往踢西甲、法甲、歐聯等歐洲賽事,但未來嘅事情冇人知,我會根據實際情況作出決定。」
阿根廷另1位老將迪馬利亞踢完今屆美洲國家盃後,就會退出國家隊,美斯認為新生代球員成長速度快,可以接替一班老將:「隊內只剩下我、迪馬利亞(36歲)、奧達文迪(36歲)3位老將,阿根廷好快會完成換血,並且仲有好多年輕球員可以接班,佢哋實力非常強,正在等待上陣機會。」其中19歲翼鋒阿歷真度加拿祖今季表現出色,為曼聯上陣50場入10球,被睇好最有潛力成為美斯接班人。