C朗齋坐　葡萄牙歷史性首負克羅地亞

周日(9日)凌晨國際熱身賽，葡萄牙主場以1比2不敵克羅地亞，亦係兩軍歷來第8次交鋒，葡萄牙首次輸波。C朗拿度今仗雖然已歸隊候命，不過領隊馬天尼斯並冇派佢落場，連續2場都冇份上陣，周三(12日)凌晨對愛爾蘭係C朗決賽周前最後熱身機會。

C朗完成沙特阿拉伯球季後歸隊，不過就畀佢休息，前線由干卡路拉莫斯掛帥，葡萄牙今場表現麻麻，8分鐘就輸12碼，克羅地亞由莫迪歷操刀射入。葡萄牙半場變陣，48分鐘即由迪奧高祖達龍門口射入追平，但克羅地亞再發力，安迪布迪美亞56分鐘頭槌頂入，助克羅地亞贏2比1。葡萄牙之前7次對克羅地亞6勝1和，但紀錄喺歐國盃前斷纜。

為葡萄牙入波嘅迪奧高祖達賽後表示：「克羅地亞係支好強嘅球隊，我哋控制晒局面，但佢哋擺脫我哋嘅高位逼搶就好大威脅。結果並唔重要，葡萄牙得到一次好好嘅演練機會，我哋要好好準備下一場，我哋目標當然係歐國盃冠軍。」