盧卡古起孖　進佔歐洲歷史射手榜第2位

比利時周日(9日)凌晨喺熱身賽，主場3比0炒盧森堡為歐國盃壯行色，前鋒盧卡古今場又入2球，繼續刷新佢保持嘅比利時入球紀錄，而且累積85個國際賽入波，更超越匈牙利傳奇普斯卡斯，成為歐洲史上國際賽第2多入波球員，認真犀利！

比利時上仗2比0贏黑山，今仗對盧森堡更加輕鬆，盧卡古42分鐘爆入禁區博到12碼，佢親自操刀先開紀錄；57分鐘再接應謝利美杜古傳中近門射入。完場前10分鐘，李安度杜沙特接應長傳，控定後窩利抽入，連續2場賽事入波，助比利時大勝3比0完場。

盧卡古為比利時累積入85球，超越匈牙利名將普斯卡斯嘅84球，係史上國家隊入球排名第6位，亦係歐洲球隊中嘅第2位，僅次於葡萄牙球王C朗拿度(128球)。