英格蘭公布球衣號碼　暗藏正選陣容

英格蘭國家隊繼公布出戰今屆歐國盃26人大軍名單之後，現時亦落實球衣號碼，中場祖迪比寧咸獲得代表王牌嘅10號，布卡約沙卡將會着「傳奇7號」，加上9號哈利卡尼、11號菲爾科頓，反映「三獅兵團」正選陣容已有定案。

國際賽傳統上，主力球員多數着1至11號「細冧巴」，從英格蘭今次球衣號碼分配，可以見到領隊修夫基心目中嘅正選陣容基本上已確定。正選門將係1號比克福特，後衞右至左分別係2號基爾獲加、5號史東斯、6號馬克古希、3號勞基梳爾。

值得留意，23歲水晶宮中堅馬克古希接過因傷落選嘅哈利馬古尼件6號波衫，證明佢喺修夫基眼中有重要地位，至於勞基梳爾有傷在身，亦可能由捷比亞暫代正選左閘。

中場方面，4號迪格蘭賴斯、10號祖迪比寧咸屬於鐵膽，踢右閘出身嘅阿歷山大阿諾特喺國家隊轉任中場，有出色表現，佢今次亦獲得「中場中」球員嘅8號，似乎有望佔一席中場正選。

正選雙翼應該屬於「7-11」布卡約沙卡、菲爾科頓，加上9號單箭頭隊長哈利卡尼，組成鋒線鐵三角。