考起費歷克 巴塞9個球員未能註冊

2024年06月09日 22:02
東網電視
更多新聞短片
費歷克上任即有大麻煩。
西甲勁旅巴塞隆拿嘅財政問題持續惡化,據《The Athletic》報道,佢哋目前有9名一隊球員未能註冊,除非可以喺6月30日或之前撲到1.3億歐元收入,否則夏天註冊新球員將非常困難。
以目前財政政狀況,巴塞有9名球員唔可以註冊,包括域陀洛基、恩尼高馬天尼斯2名上季加盟球員,以及耶馬、古巴斯、巴爾迪等青訓球員嘅職業合約。雪上加霜嘅係,巴塞上季外借出去嘅基文迪朗格勒、安素法迪、達斯、艾利加西亞等球員,借用合約結束後,佢哋嘅人工會即時納入巴塞數簿,令球會嘅薪酬空間更加「唔見使」。
報道指巴塞需要喺6月份結束嘅財政年度前,搵到1.3億歐元資金先可以解決問題,而球會正尋求新資金,包括同贊助商Nike商討更改巨額贊助費嘅支付方式。法蘭基迪莊、拉芬夏比洛尼等球員亦可能會被出售套現,德國籍新帥費歷克上任即遇重大難題。