曼聯決策揼波鐘 坦哈格不滿「生死未卜」
曼聯上月底贏得英足盃冠軍,以捧盃嚟完結23/24球季,新老闆拉特克利夫即進行終極檢討,包括決定領隊坦哈格嘅去留。不過距離英足盃決賽已超過2星期,最終決策一直拖延未出,據報坦哈格亦感到唔耐煩,認為揼波鐘會影響曼聯準備新一季賽事。
喺英足盃決賽前,英國媒體廣泛報道坦哈格將會被炒,甚至已經同新帥目標聯絡,不過曼聯擊敗曼城捧盃,又令坦哈格加番唔少分。原本拉特克利夫嘅檢討會議,打算1個星期內有決定,點知依家過咗半個月都冇聲氣。英國《太陽報》報道,「生死未卜」嘅坦哈格依家正同家人度假,但對曼聯遲遲未有決定頗為不滿。
坦哈格喺英足盃後表明「唔怕被炒」,豪言自己去到邊都會繼續贏冠軍,有消息指曼聯嘅潛在新帥名單上,仍有修夫基、樸達同普捷天奴,下季邊個執教仍然係未知數。曼聯帥位未定,亦影響組軍工作,例如卡斯米路嘅去留、係唔係買斷蘇夫恩岩拉伯特等問題,都有待帥位問題解決先會執行。