比寧咸終於歸隊　修夫基：唔好旨意晒佢！

英格蘭上場熱身賽主場0比1輸畀冰島，表現飽受批評，唔少人認為缺少祖迪比寧咸喺中場嘅創造力，英格蘭就變「冇牙獅子」，不過領隊修夫基就強調，英格蘭唔會旨意晒比寧咸「一個救全家」，要贏冠軍就要全隊一齊交出表現。

比寧咸為皇家馬德里贏歐聯冠軍後，獲准休息至周日(9日)先至歸隊，球隊上仗輸畀冰島表現乏善可陳，菲爾科頓同高爾彭馬未能帶起球隊進攻，上季喺皇馬入23球同交出13次助攻嘅比寧咸，就被捧為英格蘭嘅救世主。

比寧咸歸隊片段：https://twitter.com/i/status/1799856335648854519　

英格蘭領隊修夫基表示：「我哋唔可以乜嘢都靠比寧咸，個責任唔喺佢身上，而係全隊上下包括教練，都要有好嘅心態去做到最好。比寧咸當然係個好有影響力嘅出色球員，但英格蘭有好多好球員，靠1個人係唔會贏到冠軍。」