超黑仔！捷克主將踩單車跌傷　緣盡歐國盃

歐國盃決賽周今個星期展開，捷克喺開波前傳出壞消息，中場主將沙迪歷日前踩單車跌傷，傷勢嚴重將無緣出戰歐國盃，認真黑仔！

捷克上場熱身賽7比1大勝馬爾他，效力川迪嘅沙迪歷戴上隊長臂章，第2日領隊哈錫就安排一班落場球員進行輕鬆個人練習，估唔到沙迪歷喺踩單車嗰陣發生意外，導致腳部出現撕裂。捷克足總證實沙迪歷將唔會隨隊去德國參加歐國盃。

哈錫表示：「呢個消息係好大打擊，沙迪歷係球隊中比較有經驗嘅球員，上場我畀佢做隊長唔係冇原因。如果我哋決定補選球員，會盡快作出公布。」捷克喺歐國盃身處F組，首場分組賽會喺下周三(19日)凌晨對葡萄牙。