狼隊願放柏度尼圖　英超3雄吼實

葡萄牙翼鋒柏度尼圖近年雖然不斷受傷患困擾，不過無限潛力未被忽視，已入選葡萄牙歐國盃大軍嘅佢，據報受到利物浦、熱刺同阿仙奴3大豪門垂青，而狼隊亦願意放人，但已講明6,000萬鎊轉會費定價「1個崩都不能少」。

24歲嘅柏度尼圖上季因傷缺陣多時，但喺24場上陣時間仍有3個入波同11次助攻，葡萄牙亦選佢去踢歐國盃。據《The Athletic》報道，狼隊雖然唔希望失去柏度尼圖，但亦唔會阻止佢轉去更大球會，前題係6,000萬鎊轉會費要收到足先可成事，而利物浦、熱刺同阿仙奴都打呢位翼鋒主意。

事實上，狼隊已接近完成收購「柏度尼圖2.0」，據報佢哋將用1,500萬歐元收購布拉加翼鋒洛迪高高美斯，呢位葡萄牙U21新星上季外借艾斯杜尼，有7個入波同7次助攻，盤扭同高速踢法都有柏度尼圖影子，話唔定會取代柏度尼圖嘅位置。