世盃外　香港作客土庫曼　全力爭勝

香港男子足球代表隊將於周二（11日）出戰最後1場「2026世界盃暨2027亞洲盃聯合外圍賽第二圈」E組賽事，作客阿什哈巴德大球場鬥土庫曼。雖然港隊出線無望，但上場對伊朗踢出拼勁，收穫好評，期待是役繼續踢出驚喜，以1場勝利為世盃外收尾。（周二晚上11時正開賽）

篤定出局的港隊，目前在E組5戰得1分，因得失球差不及同分的土庫曼，敬陪末席，因此港隊要贏波才能避免「包艇」，門將葉鴻輝承認球隊需時適應當地仿真草場地，才能與對方周旋：「香港啲仿草場表面比較軟，但土庫曼嗰場就偏硬，踢落去嘅感覺唔同，大家要花啲時間適應。」談到今場對手，「阿輝」形容土庫曼行軍迅速，呼籲隊友小心提防：「首循環見到土庫曼翼鋒速度快，畀到我哋好大壓力，所以大家要小心佢哋放過頭波打身後。」

史提芬彭利拿就道，球隊會繼續嘗試作出逼搶，製造入球機會：「土庫曼防守唔錯，但球隊有好多出色嘅前鋒，如果可以利用逼搶製造埋門機會，絕對有能力入多幾球。」「肥彭」續稱縱使球隊出線無望，但強調眾將鬥志依然高昂，力爭以勝利完成外圍賽。

暫代主教練盧斯爾出席賽前記招時，表示自己的戰術風格，跟早前離任的莊恩安達臣未有太大分別，盼望球隊踢出部署，爭取勝利：「我過去兩年都係做『安帥」嘅助教，所以喺我執教下，球隊風格唔會有大改變，會繼續打逼搶，畀壓力對手。」談到上場各有1球進帳的馬希偉及杜俊暉，盧斯爾指二人在操練表現出色，今場隨時齊齊擔正。

港隊中堅艾里奧則稱，球隊正努力適應土庫曼當地天氣，相信球員屆時有足夠狀態應付賽事：「呢度同香港比，明顯熱好多，但練咗幾日波之後，見到大家適應得唔錯，希望所有隊友可以克服一切困難，幫港隊贏番場。」

至於土庫曼近況未如理想，上場以1比3不敵烏茲別克後，令球隊在2024年的國際足協正式賽事中，暫時4戰全敗，加上首循環梅開二度，助球隊以2比2打和港隊的傑志翼鋒明加索夫，季尾受傷患困擾，未有入選是次大軍，勢必令土庫曼側擊有所削弱。

港隊預計陣容

門將：1.葉鴻輝

後衞：21.茹子楠 5.艾里奧 4.鐘樂安 17.陳晉一

中場：8.陳俊樂 6.胡晉銘 16.陳肇鈞

前鋒：15.馬希偉 9.安永佳 10.史提芬彭利拿