新星獲國家隊處子球　荷蘭大炒冰島

周二(11日)凌晨國際熱身賽，荷蘭以4比0大勝冰島，被寄予厚望嘅21歲新星沙維西蒙斯終於開齋，首次為國家隊入波。「橙衣兵團」連續2場熱身賽贏4球，盡顯強大攻力，為周日(16日)晚歐國盃分組賽對波蘭，壯大聲勢。

荷蘭繼上仗贈加拿大4蛋之後，今仗亦冇留力，開賽23分鐘，沙維西蒙斯接應杜費斯頭槌二傳，近門射入打開紀錄，呢位RB萊比錫中場狀態大勇，今季德甲入8球及11次助攻，加上喺國家隊開齋，相信可以穩坐正選。

換邊之後，荷蘭繼續強攻對手，兩位後衞合作，尼敦阿基頭槌頂前，華基爾雲迪積克近門頂入成2比0。跟住輪到後備上陣嘅前鋒當耶爾馬倫表演，佢單刀射入1球後，補時再貢獻助攻，橫傳畀韋格賀斯射成4比0完場，呢位前曼聯射手連續2場波入，腳風非常順。

荷蘭位處歐國盃D組，將於周日(16日)晚首場分組賽對波蘭，之後對法國、奧地利。